Kennarasamband Íslands gagnrýnir harðlega samskiptaleysi Sambands íslenskra sveitarfélaga við stéttarfélagið – Vilja vita af hverju grunn- og leikskólum er ekki líka lokað?

Forysta Kennarasambands Íslands (KÍ) er ekki ánægð með viðbrögð Sambands íslenskra sveitarfélaga vegna samkomubannsins sem ríkisstjórnin lýsti yfir frá og með mánudegi. 

Í tilkynningu frá forystu kennara til félagsmanna í dag kemur fram að félagið hafi kallað eftir frekari upplýsingum frá sóttvarnalækni um það hvers vegna lagt er til að grunn- og leikskólum sé haldið opnum en framhaldsskólum og háskólum lokað og hvaða skilyrðum það er háð.

Í skilaboðum KÍ til kennara er tekið fram að KÍ hafi harðlega gagnrýnt Samband íslenskra sveitarfélaga vegna samskiptaleysis þeirra við stéttarfélag kennara og skólastjórnenda á fundi í dag. 

Tölvupóstur KÍ til kennara er hér birtur í heild: 

„Ágætu félagsmenn!

Forysta Kennarasambands Íslands var að koma af fundi með ráðherra mennta- og menningarmála í kjölfar ákvörðunar um samkomubann í morgun.

Rétt í þessu voru einnig birtar tvær auglýsingar frá heilbrigðisráðherra: Auglýsing um samkomubann og auglýsing um skólahald í landinu.

Auglýsingin um skólahald er afar óljós og nákvæmar upplýsingar um hvernig áætlað er að halda úti skólastarfi í grunnskólum, leikskólum og tónlistarskólum eru ekki enn fyrirliggjandi.

Kallað var á fundinum eftir frekari upplýsingum frá sóttvarnarlækni um það hvers vegna lagt er til að grunn- og leikskólum sé haldið opnum en framhaldsskólum og háskólum lokað – og hvaða skilyrðum það er háð. Jafnframt mun KÍ fara fram á greinargóðar upplýsingar um það með hvaða hætti sveitarfélög ætla að tryggja velferð og öryggi nemenda og starfsfólks í leik- og grunnskólum.

KÍ gagnrýndi á fundinum harðlega samskiptaleysi Sambands íslenskra sveitarfélaga við stéttarfélag kennara og skólastjórnenda. Kennarasambandið hefur farið fram á fund með forystu sambandsins þar sem farið verður yfir málið.

Frekari upplýsinga er að vænta um leið og frekari skýringar liggja fyrir.“

Aðrar Fréttir

Share on facebook
Facebook
Share on google
Google+
Share on twitter
Twitter
Share on linkedin
LinkedIn