Óeirðalögregla í Líbanon hefur skotið táragasi á mótmælendur sem reyndu að brjótast í gegnum hindrun til að komast inn í þinghúsið í Beirút, að sögn Reuters.
Reiði hefur vaxið gegn líbönskum stjórnvöldum eftir stórfelldar sprengingar í Beirút í vikunni og nú standa yfir mikil mótmæli þar sem mörg hundruð þúsund manns taka þátt.
Mótmælin gegn yfirvöldum og stjórnvöldum hófust eftir að í ljós kom að mikið magn af sprengiefnum var geymt í vöruhúsum, gegn betri vitneskju, á hafnarsvæði Beirút. Meira en 150 manns létust og nokkur þúsund særðust í sprengingunum á þriðjudag.
Erlend sendiráð hafa hvatt borgara sína til að halda sig frá mótmælum þar sem þau gætu stigmagnast.
