Innlent | 28.July

Umfjöllun: Þingmenn góða fólksins hugsjúkir vegna Piu

Þingmenn og aðrir lukkuriddarar góða fólksins hér á landi virðast margir hverjir hafa lent í miklu sálrænu drama bæði fyrir og eftir að þingforseti danska þingsins var hér í heimsókn. Þannig lýsti Helga Vala Helgadóttir þingmaður Samfylkingarinnar því í viðtali á RÚV hvernig hún þjáðist í mikilli sólarhrings hugarangist þegar hún áttaði sig á því að Pia Kjærsgaard er þingforseti danska þingsins og myndi ávarpa hátíðarsamkomuna á Þingvöllum. Pia hefur verið forseti danska þingsins í nokkur ár en það virðist sem þingmenn lýðskrumsflokkanna Vinstri grænna, Samfylkingar, Pírata og Viðreisnar hafi ekki verið kunnugt um það enda virðast þeir ekki lesa sér til um það sem er að gerast í Evrópu, hvað þá dagskrá og tilkynningar Alþingis.

Eins og fram hefur komið í fjölmiðlum virðast þingmenn vinstrimanna og góða fólksins ekki hafa lesið dagskrá og fundarboð sem sent var til þeirra mörgum vikum fyrir fundinn á Þingvöllum. Á fundinum setti Helga Vala upp leiksýningu sem varð henni til skammar en hún strunsaði af fundi þegar þingforsetinn danski hóf mál sitt.

Aðrir landsþekktir vinstri rugludallar blanda sér í umræðuna

Aðrir landsþekktir lýðskrumarar og rugludallar góða fólksins á vinstrivæng stjórnmálana hafa blandað sér í umræðuna og virðast alveg jafn hugsjúkir. Þannig hefur Egill Helgason ekki vandað Piu kveðjurnar og Illugi Jökulsson skrifaði Piu opið bréf á dönsku sem birt var í stundin.is. Í bréfinu fullyrðir Illugi að meirihluti Íslendina fyrirlíti Piu og pólitískar skoðanir hennar.

En það er þekkt þegar góða fólkið tekur til máls þá telur það sig þess umborið að tala fyrir hönd þjóðarinnar. Ekki batnar málið. Guðmundur Andri Thorsson, rithöfundur og þingmaður Samfylkingar, skrifar í danska blaðið Information í skáldlegum hugaræsingi þar sem hann snýr út úr ræðu þingforsetans danska eins og vænta mátti af góða fólkinu. Hann skammast út í Piu fyrir að hrósa Íslendingum en hún sagði að Íslendingar séu vörslumenn hins norræna anda. Þess má geta að dagblaðið Information er málpípa góða fólksins í Danmörku og sósíalista. Agli Helgasyni er líka mikið niðri fyrir í pistli sem birtur var í dv.is en þar hefur hann áhyggjur af því að fólk sem ekki er sammála honum og hinu góða fólkinu sé í sókn í Evrópu.

Ekki í fyrsta skipti sem góða fólkið verður sjálfu sér og landinu til skammar

Þetta er ekki í fyrsta skipti sem góða fólkið spilar rassinn úr buxunum. Það voru ókrýndir konungar lýðskrumsflokkanna hér á landi sem eiga heiðurinn af því. Áhrifafólk úr röðum öfgastjórnmálaflokksins Pírata var uppvíst af að dreifa því í erlenda miðla og á netið að hér á landi sæti stjórn barnaníðinga að völdum þegar það varð opinbert að aldraður faðir Bjarna Benediktssonar hefði mælt með að maður sem sekur var um barnaníð yrði náðaður, fengi uppreist æru. Eins og kunnugt er vissi Bjarni ekki af þessum gjörning föður síns.

Fólk hefur áhyggjur: Hvernig niðurlægja þeir sjálfan sig og landið næst?

Það er ekki ósanngjarnt að segja að sjá má á netmiðlum að margir hafa áhyggjur af því hvaða „ballöðu“ vinstrimenn setja í næst til vansa fyrir íslensku þjóðina og er það ekki að ástæðulausu miðað við það sem á undan er gengið.